Programi FLOWS, në bashkëpunim me Bankën Botërore, i është përgjigjur kërkesës së Ministrisë së Ekonomisë për t’iu qasur në mënyrë të strukturuar dhe profesionale problemit të pranisë së manganit në Liqenin e Badocit, një burim i rëndësishëm për furnizimin me ujë të pijes për rajonin e Prishtinës.
Si hap i parë në këtë proces, janë angazhuar ekspertë ndërkombëtarë, të cilët po mbështeten nga ekspertë vendorë, me qëllim të vlerësimit të gjendjes aktuale, identifikimit të shkaqeve dhe hartimit të zgjidhjeve teknike afatshkurtra dhe afatgjata.
Takime institucionale dhe koordinim ndërsektorial
Ekipi i ekspertëve ka nisur misionin me takime zyrtare me Zëvendësministrin e Ekonomisë dhe stafin e tij, si dhe me përfaqësuesit e KRU Prishtina, ku janë diskutuar shqetësimet aktuale, sfidat teknike dhe pritshmëritë nga ky proces.
Këto takime kanë shërbyer si bazë për koordinim institucional dhe për përcaktimin e prioriteteve të menjëhershme në adresimin e problemit.
Vizita në terren dhe analizë e sistemit
Në vazhdim, së bashku me ekipet e KRU Prishtina, janë realizuar vizita të detajuara në terren, duke filluar nga Impianti për Trajtimin e Ujit të Pijes në Badoc, e më pas duke vazhduar në:
- digën e Liqenit të Badocit,
- ujërrjedhat dhe burimet që furnizojnë liqenin.
Këto vizita kanë mundësuar një vlerësim praktik të gjendjes së infrastrukturës, proceseve të trajtimit të ujit dhe faktorëve natyrorë e mjedisorë që ndikojnë në cilësinë e ujit.
Shkëmbim i të dhënave dhe bashkëpunim me institucionet relevante
Pjesa e parë e misionit ka përfunduar me takime pune intensive dhe shkëmbim të të dhënave teknike dhe shkencore me një sërë institucionesh kyçe, përfshirë:
- KRU Prishtina
- Autoritetin e Rajonit të Pellgjeve Lumore
- Agjencinë për Mbrojtjen e Mjedisit
- Institutin Hidrometeorologjik
- Institutin Kombëtar të Shëndetësisë Publike
Ky bashkëpunim ndërinstitucional synon të sigurojë një qasje gjithëpërfshirëse dhe të bazuar në evidencë për adresimin e problemit.
Hapat e ardhshëm
Në fazën e radhës, procesi do të pasojë me takime shtesë me:
- Shërbimin Gjeologjik,
- Komunën e Prishtinës, në lidhje me planet zhvillimore në pellgun e Badocit,
- si dhe institucione të tjera relevante.
Në muajin mars, pritet publikimi i raportit përfundimtar të ekipit të ekspertëve, i cili do të përmbajë:
- gjetjet kryesore,
- analiza teknike,
- dhe propozime konkrete për zgjidhjen e problemit me manganin në Liqenin e Badocit.
Ky proces përfaqëson një hap të rëndësishëm drejt sigurimit të cilësisë së qëndrueshme të ujit të pijes, mbrojtjes së shëndetit publik dhe menaxhimit afatgjatë të burimeve ujore.